چیئرمین انٹرنیشنل کرکٹ کونسل کا پی سی بی حکام کے ہمراہ سیف سٹیز اتھارٹی کا دورہ
چیئرمین آئی سی سی گریگ بارکلے اور چیف ایگزیکٹو جیف ایلرڈائش نے کیمروں سے سرویلنس کا جائزہ لیا
مینجنگ ڈائریکٹر محمد کامران خان نے ایشیا کپ کیلئے سکیورٹی انتظامات کے حوالے سے بریفنگ دی
پاکستان آ کر اچھا محسوس کر رہا ہوں، کرکٹ کیلئے پاکستانیوں کا جذبہ دیدنی ہے،چیئرمین آئی سی سی گریگ بارکلے
پاکستان میں ایشیا کپ کا انعقادکے حوالے سے سکیورٹی انتظامات کے جائزہ لینے کیلئے چیئرمین آئی سی سی اور پی سی بی حکام نے پنجاب سیف سٹیز اتھارٹی کا دورہ کیا۔ تفصیلات کے مطابق چیئرمین آئی سی سی گریگ بارکلے اور چیف ایگزیکٹو آفیسر جیف ایلرڈائش نے سیف سٹیز اتھارٹی دورہ کے موقع پر کیمروں سے سرویلنس کا جائزہ لیا۔ اس موقع پر مینجنگ ڈائریکٹر محمد کامران خان نے ایشیا کپ کیلئے سکیورٹی انتظامات کے حوالے سے بریفنگ دی۔چیئرمین آئی سی سی گریگ بارکلے نے شہر بھر میں نصب کیمروں سے روٹس کو مانیٹر کیا اور ایشیا کپ کیلئے سکیورٹی انتظامات پر اطمینان کا اظہار کیا۔ آئی سی سی وفد کو پاکستان دورہ کرنے والی ٹیموں کو دی جانے والی سکیورٹی کی ویڈیوز دکھائی گئیں۔ وفد کو ائیر پورٹ، سٹیڈیم روٹس، ہوٹلز، پارکنگ اور پولیس فورس کے انتظامات بارے بریفنگ دی گئی۔ آئی سی سی وفد کو جدید ٹیکنالوجی کے استعمال و قانون نافذ کرنے والے اداروں کے باہمی اشتراک بارے بتایا گیا۔مینجنگ ڈائریکٹر پنجاب سیف سٹیز اتھارٹی محمد کامران خان نے وفد کو بتایا کہ لاہور میں کرکٹ کیلئے سکیورٹی انتظامات بین الاقوامی معیار کے مطابق ہیں۔چیئرمین آئی سی سی گریگ بارکلے کا کہنا تھا کہ سیف سٹیز لاہور کا انفراسٹرکچر دنیا کے بہترین سسٹمز میں سے ہے۔ پاکستان آ کر اچھا محسوس کر رہا ہوں، کرکٹ کیلئے پاکستانیوں کا جذبہ دیدنی ہے۔ مینیجنگ ڈائریکٹر محمد کامران خان نے چئیرمین آئی سی سی کو سیف سٹیز اتھارٹی کی جانب سے یادگاری شیلڈ پیش کی۔
